ضحية إعلان محمد رمضان يكشف رد فعل الفنان بعد إصابته

كشف الفنان الشاب يوسف عمر الذي أصيب في إعلان محمد رمضان، كواليس الإعلان، وكيف تعامل معه "رمضان" بعد الانتهاء من التصوير.وأضاف خلال مداخلة هاتفية ببرنامج "الحكاية" الذي يقدمه الإعلامي عمرو أديب بقناة "إم بي سي مصر": "الإعلان اللى اتصور عبارة عن جيم زي لعبة بابجي ومن بطولة محمد رمضان، ولم أتخيل أن تتحول لعبة الإعلان إلى حقيقة كادت تودي بحياتي".وتابع: "المسئول عن المتفجرات بالإعلان وضع قنبلة تحت رجلي ولكن متوقعتش أنى أتعرض للأذى، وكنت فاكر أنها صوت ودخان ولكن فوجئت أنها حقيقية".وأكمل: "وداني فيها مشكلة بسبب الصوت، ومحستش برجلي، ولولا ستر ربنا كان ممكن أموت".

وأشار: "محمد رمضان جالي بعد التصوير وقاللى عاش يا بطل، ومشهد جميل، ومكنش شاف حاجة في رجلي اللى تعرضت للأذى".وأكمل: "أنا مش عارف إذا كان اللى حصل معايا غلطة ولا المسئول عن التصوير كان قاصد يحصل فيا كل الأذى ده".

واستطرد: "اللى أثار ضيقي وغضبي أن عصام الوريث اللى مسئول عن الإعلان قاللى أنت اللى غلطان ونطيت متأخر، وأنا لو كنت قفزت متأخر كنت أموت فيها".

وتابع: "تعرضت للتهديد من عصام الوريث واتعملي كارت إرهاب بعد التصوير برغم أنى ضحية وقاللى: "أنا سمعت أنك رافع عليا قضية وأنت اللى غلطان"، معقبًا: "أنا مش عارف إزاي يستهتر بحياة الناس بالشكل ده".

وتوعدت الفنانة لبنى ونس، الفنان محمد رمضان، بعد تعرض نجلها الفنان الشاب يوسف عمر لإصابة بالغة خلال تصوير إعلانه الجديد.

وكتبت "لبنى ونس" عبر صفحتها على فيس بوك: "إذا عملنا كل حاجة طبيعية وحقيقية كنا هلكنا، ولا تلقوا بأيديكم إلى التهلكة.. يعني إذا في مشهد يا أستاذ محمد التمساح بياكلك نترحم عليك ويبقى آخر مشهد في حياتك! في مهنتنا يا أستاذ محمد رمضان وأنت وأنا وكلنا عارفين إن ما يسمى بالنجم استغفر الله العظيم بيتعاملوا معاه في اللوكيشن كأنه إله هو المحور والكل يدور حوله".

تابعت: "هل ممكن تتعرض لما حدث لابني في التصوير معاك، مستحيل طبعًا بتعمل أكشن وبتبقى عارف قبلها كل تفاصيله مرة واتنين وعشرة، واللي عاجبك بتوافق عليه واللي مش عاجبك بتغيره".

أضافت: "يعني القنبلة اللي زرعها عصام الوريث لابني تحت منه ومن غير ما يقوله ولا حتى يلبسوا واقي يقدر يعمل معاك كده ليه؟! أنت بني آدم وابني مش بني آدم أنت أغلى الناس عند والدتك ويوسف نن عيني ومفيش أغلى من الضنا حط ابنك مكان يوسف هتقول برضه كله في حبكم يهون!".

ثم ختمت كلامها قائلة: "بس أرجع وأقول لك ابني ربنا هيجب له حقه من اللي اسمه عصام الوريث ده اللي ميعرفش أبجديات عمله اللي بيستبيح حياة الشباب عشان يحقق الطبيعية المزعومة، الغلط اللي حضرتك بتتكلم عنها حق ابني إن شاء الله هيرجع له مش هسيبه عشان يبطل سي الوريث ده أنه يستهين بحياة الناس، سؤال بقى لما نموت سيادة النجم هيندفن فين؟ الديان والعدل والحق موجود واعتمدنا عليك يا رب".

قد يهمك أيضــــــــــــــــًا :

إصابة محمد رمضان بجروح شديدة خلال تصوير "موسى"

محمد رمضان يكشف حجم إصابته بالقنبلة بعد مهاجمته